Përshëndetje! Kam një shqetësim në lidhje me ciklin menstrual. Herën e fundit kam pasur shumë pak menstruacione, dhe kjo vetëm gjatë kohës kur urinoja. Pjesa tjetër e ditës kalonte shumë pastër. Kjo ka zgjatur 4-5 ditë. Theksoj se nuk kam kryer asnjëherë marrëdhënie seksuale.
Përgjigjet Lulzime Gurra, mjeke gjinekologe pranë Qëndrës Shëndetësore Nr.1 në kryeqytet.
Ka shumë faktorë që ndikojnë në çrregullimet e ciklit menstrual. Kemi faktorë natyrorë dhe faktor mjekësorë.
Cili menstrual mund të ndryshojë si pasojë e ndonjë situate stresuese që kalon femra, nga rënia ose shtimi i shpejtë në peshë, ndryshimi i klimës etj, por mund të jetë edhe për shkaqe shëndetësore, si për shembull, infeksionet e ndryshme, tiroidet, miomat, polipet apo edhe kistet në vezore. Nëse kjo i ndodh për herë të parë, nuk ka ndonjë gjë për t’u shqetësuar, por nëse përsëritet, do t’i këshilloja një eko gjinekologjike për të përjashtuar çdo problem të mundshëm./ Shendeti.com.al
