Përshtati në shqip: Blertina Koka
Një banore e Parisit ka hedhur shtetin francez në gjyq pasi nuk i ka mbrojtur shëndetin nga efektet e ndotjes së ajrit.
56-vjeçarja Clotilde Nonnez, instruktore e jogës, thotë se ka jetuar në kryeqytetin e Francës për 30 vite dhe gjatë kësaj kohe gjendja e saj shëndetësore është përkeqësuar.
Madje, shëndeti i është përkeqësuar edhe më shumë kur nivelet e ndotjes së ajrit arritën majat dhjetorin e kaluar.
Avokati i saj thotë se si pasojë e ndotjes së ajrit vdesin rreth 48 mijë francezë çdo vit.
“Kemi hedhur shtetin në gjyq pasi mendojnë se problemet shëndetësore nga të cilat po vuajnë viktimat e ndotjes së ajrit janë si pasojë e mosmarrjes e masave nga autoritetet për ndalimin e ndotjes së ajrit”, deklaroi avokati François Lafforgue për revistën Le Monde.
Më shumë raste të tjera do të sillen javët e ardhshme në Lion, Lille dhe në vende të tjera, shton ai.
Znj. Nonnez thotë se ka bërë një jetë të shëndetshme, fillimisht si kërcimtare më pas si instruktore e jogës, por pavarësisht kësaj ajo ka pasur probleme me frymëmarrjen, duke filluar nga astma kronike deri në pneumoni.
Kur nivelet e ndotjes së ajrit arritën kulmin dhjetorin e kaluar, gjendja e saj u përkeqësua edhe më shumë.
“Mjekja e cila më ka trajtuar thotë se ajri në Paris është shumë i ndotur. Ajo ka pasur edhe pacientë të tjerë si unë, përfshirë edhe fëmijë dhe bebe. Kardiologu gjithashtu më ka thënë të njëjtën gjë”, tregon ajo për uebsajtin France Info.
Burimi: BBC / Shendeti.com.al
