Humbja e flokëve është diçka që shumë burra i tremben. Por ka lajme të mira, pasi ekspertët janë një hap më afër një trajtimi që mund t’i ndihmojë burrat t’i mbajnë flokët e tyre pak më gjatë.
Studiuesit në Japoni kanë identifikuar dy ekstrakte bimore që duket se nxisin rritjen e flokëve.
Lëvorja e fellodendronit është një lëvore e trashë që gjendet në pjesët tropikale të Azisë , ndërsa chinpi është lëvore portokalli e mandarinës e tharë në diell.
Mbi të gjitha, të dy ekstraktet bimore janë tashmë të disponueshme në të gjithë botën, dhe nuk kushtojnë shumë.
‘Ekstrakti bimor i ‘Phellodendron Bark’ dhe ‘Chinpi’ ka efektin e prodhimit të PlGF, i cili është i përfshirë në rritjen e flokëve’, shpjegoi ekipi në Rohto Pharmaceutical Co.
Kjo teknologji pritet të aplikohet jo vetëm në flokë, por edhe në qerpikë dhe zona të tjera.
Ekzistojnë disa mundësi trajtimi në dispozicion tashmë, duke filluar nga paruket deri te trajtimet lokale.
Megjithatë, shumë prej tyre janë të kushtueshme dhe pak prej tyre janë 100% efektive.
Në studimin e tyre të ri, ekipi në Rohto Pharmaceutical Co u nis për të gjetur një zgjidhje të arritshme.
“Për të mbështetur klientët me probleme me flokët, pavarësisht nga gjinia apo mosha, ne kemi kryer kërkime për kujdesin e flokëve për shumë vite dhe kemi lançuar produkte me qasje të ndryshme, të tilla si rritja e flokëve dhe restauruesit e tyre, përveç agjentëve pastrues siç janë shampot.
Në vitet e fundit, tregu për rritjen dhe restaurimin e flokëve ka pasur një performancë të mirë, por ne besojmë se njerëzit me probleme me flokët nuk janë në gjendje të zgjedhin lirisht produktet për shkak të faktorëve të ndryshëm si përbërësit, çmimi dhe efektiviteti”, shpjegoi ekipi.
Studiuesit vendosën të përqendrohen te Faktori i Rritjes së Placentës (PlGF).
Kjo është një proteinë e prodhuar nga qelizat e papilës dermale, e cila dihet se luan një rol të rëndësishëm në formimin e flokëve në fund të folikulit të flokëve.
“Krahasuar me faktorët e tjerë të rritjes, ka pasur më pak raportime për këtë faktor në lidhje me flokët, por ne e vumë re shpejt potencialin e tij dhe kemi kryer kërkime mbi të që atëherë“, shpjeguan ata.
Ekipi testoi disa ekstrakte bimore për të parë nëse ndonjëra prej tyre do të rriste prodhimin e PlGF dhe zbuloi se lëvorja e Phellodendron dhe agrumet Chinpi kishin të dyja këtë efekt.
Ekipi tani planifikon të zbatojë rezultatet e hulumtimit për të zhvilluar produkte për rritjen e flokëve për burrat dhe gratë.
