Ngjyra e kuqe konsiderohet si ngjyra që ndez pasionet, ndërsa bluja ngjyra që na fal qetësi.
E bardha simbolizon pastërtinë, ndërsa roza ul agresionin, prandaj dhe qelitë e burgut shpesh janë të lyera me këtë ngjyrë.
Por sipas studimeve të fundit, ndikimi që ngjyrat kanë në sjelljen tonë, është më i madh se sa mund të mendohet.
Ajo që ndodh vërtet, është se njerëzit lidhin ngjyrat me momente të caktuara në jetën e tyre, duke identifikuar kështu ngjyrën me momentin apo me mënyrën si janë ndjerë.
Supozohet se ngjyra blu lidhet me situata të qeta, pasi blu është deti dhe qielli që zakonisht kur i shohim, na japin ndjenjë qetësie.
Pas shumë aludimesh në lidhje me ndikimin që kanë ngjyrat në gjendjen tonë shpirtërore, hulumtuesit e universitetit “British Columbia” janë përpjekur të sqarojnë situatën për të gjithë nëpërmjet një prove.
Ata ulën pjesëmarrësit e studimit para ekraneve të kompjuterit me fushë të kuqe dhe blu dhe rezultoi se testet e kujtesës u realizuan më mirë në ekranet me fushë të kuqe e ndërsa detyrat krijuese u realizuan mirë në ekranet me fushë blu.
Hulumtuesit treguan se ngjyra e kuqe sinjalizon shmangien, pasi përdoret shumë herë si ngjyrë korektive e gabimeve që në shkollat fillore. Ndërsa ngjyra blu inkurajon procesin e të menduarit.
Një studim tjetër është kryer për të parë efektet e mureve rozë tek të burgosurit. Në Zvicër 20 % e mureve të burgjeve dhe stacioneve të policisë janë ngjyrë rozë. Sipas studiuesve, kjo ngjyrë është më efektive për uljen e agresionit tek të dënuarit, ndërkohë që një studim tjetër e hedh poshtë këtë teori duke treguar se ngjyra e mureve nuk ka rëndësi në nivelin e agresionit e disa të tjerë thonë se mund të ndikojë për keq pasi përfaqëson ngjyrë femërorë dhe shumë të dënuar nuk e preferojnë si ngjyrë muri.
Ekzistojnë studime që kundërshtojnë njëri-tjetrin përsa u përket ngjyrave dhe sjelljes tonë, por momentalisht dekorimi i brendshëm mund të konsiderohet thjesht një përzierje e shijes personale dhe artistikes./ Përgatiti: Elena Beta
