Rolina Naço, dietologe
Trahana: Të shtojmë pak tërshërë ose fibra (krunde nga gruri). Të shtojmë gjizë në vend të djathit, ose në vend të ujit të përdorim hirrën e qumështit, për të marrë më shumë proteina dhe kështu trahanaja e mëngjesit do të na mbajë më gjatë të ngopur, pa ndryshuar shumë shijen.
Pastiçe: Të zëvendësojmë ose të përziejmë makarona të bardha me ato integrale dhe të shtojmë perime si spinaqi, që i shkon shumë shija e djathit dhe e vezës. Në këtë mënyrë, shtojmë fibra dhe antioksidues nga perimet.
Pilaf: Të bëhet rizoto integrale me perime. “E di që nuk është e njëjta shije, por është shumë herë më i pasur, si në fibra, në vitamina dhe në kripëra minerale.”
Byrek ose petanik: Janë të pasur në karbohidrate (brumi) dhe yndyrë, ndaj dhe preferojmë t’i bëjmë me petë të holla dhe me vaj ulliri. Preferojmë ato me spinaq, lakra apo perime të tjera, si presh, qepë me domate apo kungull dimri.
Supa e thjeshtë: Është me lëng pule ose mishi dhe me makarona ose oriz, të cilat do të ishte më mirë të zëvendësoheshin me perime miks, qoftë me mish pule apo viçi ose supë krem brokoli, karotë etj. Në këtë formë ulet sasia kalorike, shtojmë fibra dhe antioksidues dhe na ndihmon të ndihemi më të ngopur.
Qofte të skuqura: Mund t’i pjekim në furrë. Në këtë mënyrë do të marrim më pak kalori nga yndyra dhe nga ana tjetër do të kenë më pak toksina, të cilat prodhohen gjatë skuqjes.
Gjithashtu mund të bëjmë qofte me mish pule ose gjeldeti, që ka më pak kalori, pasi përmban më pak yndyrë shtazore. Mund të shtojmë edhe perime të ndryshme, përveç qepës dhe erëzave, që vihen zakonisht.
Makarona të skuqura me gjalpë: Një pjatë që na ofron vetëm yndyrë shtazore dhe karbohidrate, në formën më të keqe të mundshme. Preferoni makarona me perime me salcë domate dhe vaj ulliri, për të pasuruar pjatën me fibra dhe vlera antioksiduese dhe shoqërojeni me një burim proteinash, si: djathë, peshk ton, pulë, mish të grirë apo fruta deti./ Shendeti.com.al
