Pirja e verës së bardhë dhe shampanjës, ngrënia e më shumë frutave dhe eleminimi i mbipeshës mund të zvogëlojë rrezikun e arrestit të papritur kardiak, sipas një studimi të ri.
Ekspertët kanë sugjeruar se mijëra arreste kardiake mund të parandalohen duke trajtuar problemet e shëndetit dhe të stilit të jetës.
Ata zbuluan se një konsum i moderuar i shampanjës ose verës së bardhë, më shumë fruta, ruajtja e një humori pozitiv, mbajtja e një peshe të shëndetshme dhe mbajtja nën kontroll e presionit të gjakut duket se mbrojnë nga një atak kardiak.
Njerëzit që janë më të arsimuar dukeshin gjithashtu më pak të prirur ndaj arrestit kardiak, sugjeroi studimi, ndërsa modelet e dobëta të gjumit dhe mungesa e ushtrimeve mund të jenë të dëmshme.
Një arrest kardiak – ku zemra ndalon së rrahuri papritur- është një situatë emergjente mjekësore që zakonisht ndodh pa paralajmërim.
Njerëzit papritmas rrëzohen dhe humbasin ndjenjat, dhe nuk arrijnë të marrin frymë normalisht. Pa trajtim të menjëhershëm, njerëzit humbasin jetën.
Studimi më i fundit, i botuar në Canadian Journal of Cardiology, identifikoi 56 faktorë rreziku të lidhur me arrestin e papritur kardiak dhe zbuloi se deri në 63% të rasteve mund të jenë të shmangshme.
“Siç pritej, stilet e jetesës përbëjnë barrën më të madhe”, thanë studiuesit, duke shtuar: “Fushatat e ndërgjegjësimit publik duhet të inkurajohen më tej për të promovuar ndërhyrjet në stilin e jetës.”
Studimi shqyrtoi 502,094 persona të moshës së mesme deri në të moshuar të përfshirë në të dhënat e Biobankës në Mbretërinë e Bashkuar.
Nga këta, 3,147 persona pësuan arrest të papritur kardiak gjatë një periudhe ndjekjeje prej 13.8 vitesh.
56 faktorët e rrezikut të identifikuar nga studiuesit përfshinin faktorët e stilit të jetës, statusin socio-ekonomik dhe mjedisin lokal, siç është ekspozimi ndaj ndotjes së ajrit.
Studiuesit arritën në përfundimin se midis 40% dhe 63% të rasteve të arrestit të papritur kardiak mund të jenë të shmangshme kur merren në konsideratë të gjithë 56 faktorët e rrezikut.
Për faktorët e stilit të jetës, studimi zbuloi se një konsum i moderuar i shampanjës dhe/ose verës së bardhë dhe frutave mbronte nga arresti kardiak, ndërsa ndjenjat e “ngopjes”, indekset e larta të masës trupore (BMI) dhe masa dhjamore e krahëve, presioni i lartë i gjakut dhe një nivel më i ulët arsimor rritën rrezikun./shendeti.com.al
