Në ciklin e podcasteve “Obeziteti, le të flasim për të”, mjekja endokrinologe Renta Sanxhaku ka shpjeguar dallimin mes obezitetit metabolikisht të shëndetshëm dhe atij metabolikisht të pashëndetshëm.
Sipas saj, bëhet fjalë për dallime në profilin metabolik të individëve me obezitet, të cilat lidhen me tregues si yndyrat në qarkullim, trigliceridet, nivelet e insulinës, ndjeshmëria ndaj insulinës dhe prania e proceseve inflamatore.
“Obezitet të shëndetshëm nuk ka, por flasim për pjesën e profilit metabolik”, shpjegon Sanxhaku.
Ajo sqaron se te obeziteti metabolikisht i shëndetshëm, individi mund të ketë nivele normale të yndyrave në qarkullim, pa shenja të insulinorezistencës dhe pa krijimin e një ambienti mikroinflamator të theksuar në indin dhjamor.
Ndërsa te obeziteti metabolikisht i pashëndetshëm, sipas mjekes, vërehen rritje të triglicerideve në gjak, shenja të insulinorezistencës dhe një gjendje më proinflamatore.
Sanxhaku thekson se heterogjeniteti i obezitetit e bën të nevojshme një qasje të personalizuar në trajtim, në varësi të karakteristikave të çdo individi.
Jo dieta drastike, por ndryshim i mënyrës së ushqyerjes
Mjekja ndalet edhe te mënyra e të ushqyerit, duke nënvizuar se objektivi nuk duhet të jetë vetëm rënia e shpejtë në peshë apo ndjekja e dietave drastike.
“Kur themi dietë, pra kur ne një individ e këshillojmë të ndjekë njëfarë diete, do të thotë që shpërndarja e vakteve si është”, shprehet ajo.
Sipas Sanxhakut, ngrënia vetëm një herë në ditë nuk përbën një mënyrë të shëndetshme të ushqyeri. Ajo rekomandon shpërndarjen e ushqimit në vakte kryesore, si mëngjesi, dreka dhe darka, si dhe konsumimin e porcioneve më të vogla, reduktimin e karbohidrateve dhe shtimin e perimeve.
Një tjetër element i rëndësishëm, sipas saj, është që këto ndryshime të mos shihen si një zgjidhje afatshkurtër, por si pjesë e një mënyre ushqyerjeje që duhet të shoqërojë individin në vazhdimësi.
Në këtë kontekst, mjekja përmend edhe diskutimet e fundit në kongreset e diabetologjisë, ku vëmendja është zhvendosur nga koncepti i një diete të bazuar vetëm te një numër i përcaktuar kalorish, drejt mënyrës së organizimit dhe cilësisë së ushqimit.
“Ndarja e pjatës: gjysma duhet të jetë e përbërë nga perimet, çereku nga proteinat dhe çereku nga karbohidratet. Pra fibrat, perimet duhet të jenë të parat”, thekson Sanxhaku.
