Apeli i Gjykatës Administrative ka rrëzuar sot kërkesën e Urdhrit të Infermierit për testimin e këtyre profesionistëve.
I pyetur nga “Shëndet+”, kreu i Urdhrit të Infermierit, Sabri Skënderit, tha se do të drejtohen për rekurs në Gjykatën e Lartë.
“Vendimi është bazuar në pretendimin e Ministrisë së Shëndetësisë se testimi i bluzave të bardha po realizohet vetëm si një raport për çështje studimore dhe nuk ka të bëjë me vënien në pikëpyetje të figurës së tyre. Ndaj edhe gjykata mori vendimin që mori. Gjithsesi ne kemi vendosur që ta çojmë çështjen në instanca më të larta, pasi na duket një pretendim absurd”.
I pyetur nëse testimi do të realizohet, Skënderi tha se për këtë duhet pyetur ministria.
Urdhri i Infermierit kundërshtoi procesin e testimit të infermierëve, nismë e Ministrisë së Shëndetësisë.
Nëse realizohet testimi i infermierëve, MSH do të nxjerrë udhëzimet përkatëse edhe për testimin e mjekëve. Ndërkohë për infermierët testimi është gati.
