Më 29 qershor, një grup studentësh dhe profesorët e tyre nga Fakulteti i Mjekësisë i Universitetit të Tiranës vizituan Ambasadën Amerikane, si pjesë e programit Njihu me Amerikën. Studentët mësuan më shumë mbi programet e ndryshme dhe 
Këndin Amerikan në Tiranë nga Drejtoresha e Zyrës së Burimit të Informacionit Matilda Vangjeli. Ata u prezantuan me disa nga publikimet e IIP-së dhe literaturën në gjuhën angleze që ofrohet për studentët në Këndin Amerikan.
Shefja e Zyrës së Marrëdhënieve me Publikun, znj. Valerie O’Brien foli mbi sektorin e marrëdhënieve me publikun, punën e përditshme që bëhet aty dhe programet e ndryshme, si media, grantet dhe mundësitë e arsimit që ofron Departamenti i Shtetit Amerikan.
Ambasadori Don Lu u takua gjithashtu me studentët dhe pati një diskutim të ndezur mbi sistemin shëndetësor në Shqipëri, si dhe sfidat me të cilat ata përballen pas diplomimit, sidomos mbi mungesën e vendeve për punësim dhe mundësive për të ushtruar profesionin. Ambasadori dhe studentët folën gjithashtu edhe për mënyrat e mundshme se si mund të punohet fort dhe të luftohet korrupsioni në sistemin shëndetësor në Shqipëri. Vizita u mbyll me foton tradicionale në grup./D.C.
