Sistemi shëndetësor shtetëror është një tjetër sektor që po i shtohet listës së dështimeve të qeverisë Rama. Çdo ditë e më shumë qytetarët shqiptarë nuk kanë besim tek institucionet shëndetësore shtetërore. Arsyet janë të shumta e nga më të ndryshmet. Shëndetësia falas vijon të mbetet një premtim i pambajtur i qeverisë Rama. Por veç kësaj qeveria ka shënuar dështim edhe me sistemin e barnave të rimbursushme. Të paktën dy skandale multimilionëshe kanë zbuluar vjedhjen e qytetarëve me anë të kësaj skeme.
Sot qytetarëve u duhet të paguajnë për ilaçe që nuk i gjejnë nëpër spitale apo në listat e barnave të rimbursueshme. Mungesa e medikamenteve, një tjetër premtim i Rilindje, vijon të mbetet problem i pazgjidhur e madje me tregues të përkeqësuar. Mungesa e investimeve në pajisje shëndetësore dhe shërbimi pa standard janë të tjerë faktorë që e bëjnë sistemin shëndetësor shtetëror të pabesushëm për qytetarët. Të dhënat tregojnë se shqiptarët po u drejtohen më së shumti spitaleve private. Bilancet e spitaleve dhe klinikave më të njohura në vend flasin për një rritje të shpenzimeve nga viti në vit.
“Pesë spitalet dhe klinikat kryesore private në vend, Spitali amerikan (Univers-Alb), HYGEIA HOSPITAL – TIRANA, Salus, Spitali Gjerman (CARDIO & DIAGNOSTIC CENTER HAMBURG / TIR), Klinika Gjermane e Syrit, Spitali Europian (Spitali Villa Maria) kanë qarkulluar në total rreth 6 miliardë lekë, apo rreth 43 milionë euro, me një rritje prej gati 18% në raport me 2013-n. Këto para që shqiptarët kanë shpenzuar për t’u kuruar në spitalet private, janë gati sa 75% e shumës që paguan taksapaguesit për sigurime shëndetësore po në vitin 2014”, shkruan revista Monitor.
Të ardhurat nga kontributet e sigurimeve shëndetësore për vitin 2014 rezultuan rreth 8 miliardë lekë dhe pritet të arrijnë në 9.2 miliardë lekë në 2015-n. Pavarësisht kësaj, qytetarë të shumtë edhe pse janë të siguruar preferojnë spitalet private.
Kryeministri Rama ka deklaruar se premtimi për shëndetësinë falas do të përmbushet në fund të mandatit 4 –vjeçar. Por deri tani, në shëndetësi janë dhënë vetëm shërbime me koncesion, në vlera prej qindra miliona eurosh, të cilat, paguhen me taksat e shqiptarëve. Mediat kanë denoncuar vazhdimisht gjendjen skandaloze nëpër spitalet e vendit. Me dhjetëra raste janë publikuar edhe në lapsi.al (lexo më poshtë). Kushtet e këqija, mungesa e shërbimit, mungesa e medikamenteve dhe paratë nën dorë për mjekë e infermierë janë disa nga faktorët që i detyrojnë shqiptarët t’u drejtohen spitaleve private dhe të refuzojnë spitalet dhe klinikat shtetërore për t’u kuruar. Mosbesimi i shqiptarëve tek sistemi shetëtëror rritet më tej kur shohin politikanët që ata kanë zgjedhur për t’i qeverisur që preferojnë spitalet private kundrejt atyre shtetërore. Vetë kryeministri Rama e kuroi nënën e tij në një spital privat në Tiranë, pak kohë më parë. Ndërsa bashkëshortja e tij, Linda, e lindi Zahon në një klinikë private jashtë vendit. / Lapsi.al
