Donjeta Zeqa
Pas arrestimit të infermierit në Spitalin Rajonal të Lezhës për shpërdorim detyre, deputeti më i ri i Kuvendit të Shqipërisë, Eduart Ndocaj, ka bërë një vizitë në këtë spital.
Megjithëse i përket forcës së majtë, Ndocaj nuk ka përtuar të shkruajë në faqen e tij në “Facebook” lidhur me gjithë problemet që ka spitali i Lezhës.
“Dyshekë 20-vjeçarë të pa larë asnjëherë. Mund t`i shikoni edhe në foto. Në ato dyshekë duhet të shtrohen fëmijët. Imagjinoni pak sikur fëmijët tanë të shtrohen aty. Në ato kushte i gjetëm fëmijët që presin të shërohen.
-Serumet dhe shiringat që mblidhen e hidhen, por janë perdorin disa herë. Për më tepër keni edhe foto.
-Prindërit apo nënat marrin bombula gazi e blejnë vetë qumështin për të ushqyer fëmijët e tyre. Krejt jashtë çdo lloje norme të ushqyeri si dhe të sigurisë.
Pastertia linte shumë për të dëshiruar. Pra, normat e higjenes. Nënat i lajnë me dorë vetë rrobat e fëmijëve dhe i vëndosin në ballkone për t’i tharë”, shkruan Ndocaj në faqen e tij në rrjetin social “Facebook”.
Gjithashtu deputeti ka akuzuar mjekët e Pavionit të Infektivit duke thënë se ka zëra këta mjekë largohen nga pavioni pas orës 11 dhe konsumojnë alkool.
“Për spitalin e Lezhës ka zera se mjekët i gjen në kafene dhe pas orës 11 të drekës nuk përjashtohet mundësia të kenë edhe doza të forta alkooli.
Po ashtu, nuk mungojnë edhe raste të mungesës profesionale me pasoja të rënda. Ministri i Shëndetësisë duhet të ndërhyjë për të ndryshuar situaten në Spitalin Rajonal të Lezhës para se të jetë vonë,” përfundon Eduart Ndocaj.
