Denisa Canameti, gazeta Shëndet+
Një ngjarje e rëndë ka ndodhur sot me shërbimet e urgjencës në Shkodër, të cilat kanë nisur me ambulancë nga Shkodra në Tiranë një djalë të vogël të shoqëruar nga… sanitarja. Mësohet se djali ka pasur infeksion dhe temperaturë të lartë.
Burime brenda spitalit në Shkodër bëjnë me dije për gazetën “Shëndet+” se djali është shoqëruar nga sanitarja, pasi stafi mjekësor ka refuzuar ta shoqërojë. Për fat të mirë, djali tani është në gjendje të mirë shëndetësore.
Sipas ligjit, një i sëmurë në ambulancë duhet të shoqërohet nga mjeku dhe infermieri, përgjegjës për të dhënë ndihmën në rast të komplikacioneve që i sëmuri mund të ketë gjatë përcjelljes për në spital.
Në rastin përkatës, nëse fëmija do të kishte pasur ndërlikime, jeta e tij do të ishte në rrezik. Një ngjarje e tillë tregon edhe njëherë neglizhencën që tregojnë ekipet mjekësore ndaj pacientëve.
