47 punonjës në Spitalin e Pukës kanë dalë sot në protestë pasi morën lajmin për shkarkim nga puna. Infermierët dhe sanitaret e pushuar nga puna thonë për mediat se e gjithë kjo është bërë për shkaqe politike, dhe jo se nuk plotësojnë kriteret.
Ata kërkojnë që t’u thuhet shkaku kryesor pse ndodhën këto largime. “U larguam padrejtësisht nga puna. Largimet tona janë politike, nuk ka kriter tjetër. Duam të na japin përgjigje pse u shkarkuam nga puna. Mes të larguarve ka edhe nëna me fëmijë jetimë”, thonë punonjësit, ndërsa protestojnë para spitalit të Pukës.
Në mbështetje të të larguarve nga puna kanë dalë edhe mjekët, të cilët kërkojnë ardhjen e ministrit të shëndetësisë që të sqarojë situatën.
“Nuk di nëse hiqen politikisht apo për shkak të shkurtimeve. Le të vijë vetë ministri dhe ta sqarojë situatën e krijuar këtu”, shprehet Dr. Hysni Shkjau./ Shëndet+
