Arlinda Gjypi, gazeta “Shëndet+”
Ministri Beqaj vendosi pak kohë më parë që të heqë tarifën për vizitën te mjeku i familjes për personat e pasiguruar. Një gjë e tillë u propagandua me të madhe dhe me një publikim të plotë në të gjitha mediat vizive e të shkruara. Ndërkohë, totalisht në heshtje ka kaluar vendimi i ministrit të Shëndetësisë për rritjen e tarifave për vizitat te mjeku okulist dhe otorinolaringologu për personat e siguruar që duan të marrin raport për patentën apo për armëmbajtje.
Mësohet se ministri i Shëndetësisë Falas ka firmosur katër ditë më parë urdhrin që vizitat tek këta dy mjekë specialistë të bëhen kundrejt pagesës prej 1 500 lekësh për secilin. Deri tani, për aplikimet paguhej vetëm një raport prej 1 mijë lekësh, i cili mbetet gjithashtu në fuqi.
Urdhri i Beqajt është shpërndarë në të gjitha poliklinikat e specialiteteve në kryeqytet dhe në rrethe. Pra, raporti mjekësor, pavarësisht se personi është i siguruar, do të kushtojë në total 4 mijë lekë.
Pagesa për vizitën e mjekut okulist dhe otorino-laringologut si pjesë e raportit mjekësor për leje drejtimin apo veprimtarine me armët, aplikohet për herë të parë për personat e siguruar.
Pak kohë më parë në parlament ministri i Shëndetësisë u vetëlavdërua se kishte bërë të mundur uljen e tarifave për vizitat te mjeku i familjes për personat e pasiguruar, ndërsa për të siguruarit ka vendosur t’i rrisë këto tarifa. Nuk dihet nëse edhe kjo hyn në programin e ministrit Beqaj për shëndetësinë falas. Duket se i shqetësuar se ulja e tarifës për mjekun e familjes do të ulë dhe të ardhurat dytësore të qendrave shëndetësore, ministri ka gjetur një zgjidhje alternative duke rritur tarifat pikërisht për ata persona që janë taksapagues të rregullt.
