“Jam 3 vjeç! Dua të buzëqesh! Dua të rritem! Dua të jetoj!” Ishin këto vetëm disa nga thirrjet e sotme përpara shërbimit të Pediatrisë në Qendrën Spitalore Universitare “Nënë Tereza” në Tiranë, në aktivitetin “Thirr për fëmijët me kancer”.
Mungesë medikamentesh, blerje ilaçesh kontrabandë që nuk japin asnjë siguri për cilësinë e tyre, kryerje të analizave jashtë QSUT-së për shkak se vetë spitali nuk e ofron një gjë të tillë, mungesë edhe e pajisjeve elementare si gjilpërat e paracetamoli për fëmijët me kancer janë shkaqet që bashkuan shoqërinë civile me median për të bërë një thirrje publike drejtuar autoriteteve përgjegjëse shëndetësore që të hedhin sytë nga e ardhmja e këtij vendi.
“Asparaginasa ka dy javë që nuk është as në farmaci. Të paktën ilaçet për fëmijët. Ndoshta nuk do të shpëtojnë, por të mos na ngelet peng që nuk mundëm t’u japim çfarë iu duhet. Serxho është vetëm 3 vjeç. Vajza ime, mamaja e tij është vetëm 21 vjeç. Nuk mund të mbyllet jeta me kaq”, thotë gjyshja e Serxhos 3-vjeçar.
Babai i Klorianit 3-vjeçar bën të njëjtën thirrje për medikamente. “Ilaçe, asgjë tjetër. Ka disa ditë që nuk po gjejmë më as në tregun e hapur. Nuk kemi mundësi ekonomike. Borxhe kemi gjithandej. Shteti të bëjë diçka”.
Fëmijët e sëmurë me kancer vuajnë nga mungesa të mëdha të medikamenteve, ekzaminimeve, si dhe pajisjeve që u duhen për të kuruar sëmundjen e tyre. Shumë prej këtyre fëmijëve kanë muaj që nuk marrin asnjë trajtim dhe kanë ndërprerë kimioterapinë pa mundur të kurohen më tej. Prindërit kanë denoncuar në gazetën “Shëndet+” këto mungesa duke kërkuar ngritjen e zërit për fëmijët në tyre, çka çoi edhe në bashkëpunimin me shoqatën “Together for Life” për të realizuar një thirrje të tillë.
Thirrjes për fëmijët me kancer iu përgjigjën shoqëria civile, media, shoqatat e pacientëve si dhe figura të njohura që kanë dëshmuar sukses në sfidën kundër kancerit, si Ambra Meda.
Prindërit firmosën një peticion ku i bëjnë thirrje Ministrisë së Shëndetësisë të marra masa të menjëhershme për sigurimin e medikamenteve të nevojshme.
