Një 24-vjeçar është arrestuar pasi ofendoi personelin mjekësor në Spitalin e Lushnjës, dhe gjatë shoqërimit për në polici ka goditur edhe një punonjës të policisë.
Specialistët për Krimet në Komisariatin e Policisë Lushnje, arrestuan në flagrancë shtetasin Etmond Belba, 24 vjeç, banues në fshatin Çermë Proshk, Divjakë.
“Arrestimi i këtij shtetasi u bë pasi në Spitalin Lushnje ka fyer dhe ofenduar personelin mjekësor, ka thyer një vazo të madhe lulesh, dhe gjatë shoqërimit nga patrulla e përgjithshme ka kundërshtuar dhe goditur punonjësin e policisë, si edhe ka shkaktuar dëmtime në mjetin e policisë”, thuhet në deklaratën e policisë.
Materialet i kaluan Prokurorisë pranë Gjykatës së Shkallës së Parë Lushnje për veprat penale “Kundërshtimi i punonjësit të policisë së rendit publik”,”Shkatërrim i pronës”, “Prishje e rendit dhe qetësisë publike” dhe “Fyerje”.
