Denisa Canameti / Shendeti.com.al
Ministri i Shëndetësisë ka zgjedhur të flasë sot për të sëmurët me kancer gjiri dhe luftën e vazhdueshme me këtë sëmundje, nga salla e një prej hoteleve me luksoze në Tiranë, ku po mbahej edhe një konferencë mjekësore.
“Përpjekjet tona gjatë viteve të fundit kanë sjellë përparim të madh në mënyrën se si e diagnostikojmë dhe e trajtojmë kancerin për ata që vuajnë nga kjo sëmundje, dhe është e rëndësishme që të ecim më tej në këtë rrugë” tha Beqaj.
Megjithatë, pavarësisht premtimeve për përpjekje, në shërbimin e onkologjisë vazhdojnë të mungojnë kimiopreparatet. Pacientët po kthehen mbrapsht, pa mundësi për të realizuar seancat e kimioterapisë.
Herceptina, cisplatina, zometa janë tre prej medikamenteve që aktualisht mungojnë në këtë shërbim.
“Kemi 3 ditë rresht që vijmë dhe ikim se nuk ka mjekim. Për të blerë nuk i blejmë dot vetë se janë të shtrenjta”, shprehen disa prej zonjave që edhe sot janë paraqitur në dyert e onkologjikut.
Si të mos mjaftonte kjo, në shërbimin e onkologjisë ka muaj që është prishur edhe mamografia. Aktualisht po shfrytëzohet një prej mamografive lëvizëse. Burime jo zyrtare thonë se mamografia e spitalit ka 3 muaj e prishur dhe se askush nuk ka bërë asgjë për ta vënë në punë.
Përballë një situate të tillë, asnjë prej përfaqësuesve të shëndetësisë nuk ka qenë këtë muaj në shërbimin e onkologjisë për t’u sensibilizuar me të prekurit nga kanceri.
