Përshtati në shqip për “Shendeti.com.al”: Blertina Koka
Gjykata ka shpërblyer me 70 milionë dollarë gruan e cila hodhi në gjyq pudrën Johnson pasi i kishte shkaktuar kancer.
Deborah Giannecchini nga Kalifornia u diagnostikua me kancer në vezore në vitin 2012. Ajo akuzoi kompaninë Johnson & Johnson pasi nuk i ka paralajmëruar përdoruesit për rreziqet që vijnë nga produktet e saj, pavarësisht shqetësimeve të ngritura nga Shoqëria Amerikane e Kancerit në vitin 1999.
Agjencia Ndërkombëtare për Hulumtimin e Kancerit e ka klasifikuar përdorimin e pudrës për fëmijë në pjesët intime si “shkaktar i mundshëm i kancerit”.
“Jemi shumë të lumtur që gjykata mori vendimin e duhur”, shprehet avokati i znj. Giannecchini, Jim Onder.
“Ata rikonfirmuan edhe njëherë që kompania Johnson & Johnson duhet të paralajmërojë publikun që produkti i saj mund t’u shkaktojë kancer të vezoreve”.
Disa studime kanë zbuluar se femrat që e përdorin rregullisht pudrën e bebeve në pjesët intime janë 40% më shumë të rrezikuara të preken nga kanceri i vezoreve. Ndërsa një tjetër studim ka treguar se lidhja mes kancerit dhe produktit është shumë e dobët.
Gjithsesi, vendimi i fundit nga gjykata mund t’i shkaktojë humbje të mëdha kompanisë Johnson & Johnson, e cila është më e famshmja sa i përket pudrave për bebe.
Burimi: The Sun / shendeti.com.al
