Denisa Canameti / Shendeti.com.al
Tabela me simbolin që identifikon farmacitë nuk do të taksohet më si reklamë. Ka qenë ky vendimi i Drejtorisë së Tatimeve të Bashkisë Tiranë, pas kërkesës së depozituar nga Urdhri i Farmacistëve të Shqipërisë. Lajmi është bëri i ditur përmes faqes zyrtare të Urdhrit.
“…në përgjigje të shkresës suaj dhe shqetësimit të ngritur nga Urdhri i Farmacistëve, për mënyrën e taksimit të tabelës me simbolin që identifikon farmacitë, në mbështetje të akteve të sipërpërmendura dhe nenit 47 të ligjit nr. 10572014 datë 31.07.2014 “Për barnat dhe shërbimin farmaceutik “ (I ndryshuar) për tabelat, qëllimi i të cilave nuk është për të reklamuar, por synon sinjalizimin dhe orientimin, subjekti duhet të taksohet për taksën e tabelës për qëllime identifikimi”.
Diana Toma, presidente e Urdhrit të Farmacistëve të Shqipërisë, e kontaktuar nga redaksia e ‘Shëndet+’, shpjegon se prej vitesh farmacitë të cilat kishin simbolin që identifikon farmacitë, taksoheshin me të padrejtë sikur e kishin reklamë. Në fakt thotë Toma, qëllimi këtyre tabelave nuk është për të reklamuar por për të sinjalizuar dhe orientuar. Për më tepër që vendosja e këtyre tabelave është e detyrueshme me ligj.
Kështu, sipas ligjit për barnat dhe shërbimin farmaceutik:
“Emblema e farmacive dhe e agjencive farmaceutike është e detyrueshme, e konfiguruar me simbolin që paraqet një gotë me fron dhe një gjarpër. Forma, përmasat dhe ngjyra përcaktohen me urdhër të ministrit përgjegjës për shëndetësinë”./
