Denisa Canameti / Shendeti.com.al
Shërbimi i hematologjisë, në bashkëpunim me Fakultetin e Mjekësisë, kanë zhvilluar sot konferencën e XI të hematologjisë shqiptare, me tematikë “Neoplazitë limfoide në fokus”.
Pjesëmarrës në këtë aktivitet ishin mjekë hematologë, hematologë pediatër dhe transfuziologë, si edhe nefrologë, anatomopatolog, mjekë të laboratorit klinik, gjenetistë, imunologë, infeksionistë etj. Konferencën e përshëndeti edhe drejtoresha e QSUT-së Ogerta Manastirliu.
Pavarësisht nivelit shumë të lartë të referimeve dhe prezantimeve të mjekëve, interesi i drejtuesve të kupolës së sistemit shëndetësor për ti përshëndetur ato ka qenë i pakët. Jo vetëm drejtuesit, por as media nuk e përcolli sot konferencën e hematologjisë.
Këtë vit, zyra e shtypit të QSUT-së nuk ka bërë asnjë një njoftim zyrtar, në ndryshim nga viti i kaluar. Kujtojmë se, krahas onkologjisë, hematologjia gjithashtu është shërbimi më i përfolur për problematikat e shumta që mbart.
Problematika që lidhen kryesisht me mungesën e medikamenteve për të sëmurët me sëmundje gjaku. Ndoshta kjo është arsyeja e përpjekjes dëshpëruese për t’i mbajtur zhvillime të tilla jashtë syrit të medias.
