Ndoshta janë bërë të zakonshme rastet kur drejtohen mjetet në gjendje të dehur, por kur bëhet fjalë për një shofer autoambulance, çështja ndryshon.
E njëjta ngjarje ka ndodhur në datën 7 në kryeqytet, në zonën e “Kodrës së Diellit”. Burime nga policia bënë me dije për ‘BalkanWeb’ se Islam Alla, 47 vjeç, shofer i një autoambulance në një maternitet në kryeqytet, në gjendje të dehur ka përplasur tre mjete.
Fatmirësisht nga përplasjet janë shkaktuar vetëm dëme materiale. Sakaq, Policia Rrugore i ka bërë drejtuesit të autoambulancës testin e alkoolit me aparat Dragger, ku ka rezultuar se ai, drejtonte mjetin nën ndikimin e alkoolit në masën 1.00mg/l.
Gjithashtu janë kryer veprimet e nevojshme administrative dhe përpiluar dokumentacionet për siguracion për zhdëmtimin e tre mjeteve të përplasura nga ky drejtues mjeti. Materialet proceduriale i’u kaluan Prokurorisë pranë Gjykatës së shkallës së parë Tiranë, për veprën penale “Drejtim i mjetit në mënyrë të parregullt”.
