Duke filluar nga data 1 Shkurt 2017, mjekët në Qendrat Shëndetësore të Tiranës nuk do të përdorin më recetën letër për barnat e rimbursueshme, por vetëm atë elektronike.
Mjeku pajis pacientin me një kod që përbëhet nga 5 karaktere dhe me këtë kod pacienti i drejtohet farmacisë. Receta e tij, pra çka mjeku i ka përshkruar në recetë për sëmundjen që ka, identifikohet nga kodi 5 shifror që pacienti i paraqet farmacisë.
Sipas Ministrisë së Shëndetësisë, aplikimi i recetës elektronike bën të mundur ngushtimin e hapësirës korrupsion në rimbursime si dhe rrit transparencën, nëpërmjet monitorimit kompjuterik të problematikave të shëndetit publik.
Javën e kaluar janë trajnuar 317 mjekë të familjes së Kujdesit Shëndetësor Parësor (urban dhe rural) të Tiranës për përdorimin e recetës elektronike.
Faza e dytë e trajnimeve, do të vijojë në vendet e punës në Qendrat Shëndetësore deri në fund të muajit Janar. Këto trajnime janë të akredituara nga QKEV-ja, kredite këto që përfitohen pa pagesë./ shendeti.com.al
