Pas shqetësimit të ngritur nga Zyra e Veterinarisë në Bashkinë e Fierit, për rrezikun e gripit të shpendëve në këtë qark, ka reaguar Ministria e Bujqësisë.
Përmes një deklarate për mediat, nga ky institucion sqarojnë se janë analizuar nga ISUV mostrat e marra, dhe sipas tyre nuk rezulton prania e virusit të gripit të shpendëve.
“ISUV mori mostra dhe i analizoi, rezultuan negative”, thuhet në reagim.
Sipas Ministrisë së Bujqësisë dhe ISUV, ngordhja e shpendëve në fshatrat Seman dhe Topojë ka ardhur nga infeksionet e zakonshme, dhe “jo virusi i gripit të shpendëve”.
“Nuk ka vend për panik, deri tani nuk ka asnjë shenjë të virusit H5N8. Specialistët e veterinarisë në këto momente ndodhen në terren, për të verifikuar situatën”, thuhet më tej në reagimin e Ministrisë së Bujqësisë.
Shqetësimi për rikthimin e gripit të shpendëve u ngrit nga Zyra e Veterinarisë në Bashkinë e Fierit pasi u zbuluan 2 vatra të gripit të shpendëve në 2 fshatra të kësaj zone.
Luiza Strati, pjesë e kësaj zyre, ka thënë se zonat e prekura janë Semani dhe Topoja. Ajo shton se si pasojë e këtij virusi kanë ngordhur një numër i madh shpendësh në këto dy zona.
“Janë dërguar analizat në Institutin e Bujqësisë, por nuk na ka ardhur asnjë përgjigje. I bëjmë thirrje Institutit të Bujqësisë, të sjellë përgjigje. Nevojitet të merren masa dhe të vendoset karantina. Instituti i Bujqësisë të mos neglizhojë situatën. Gripi i shpendëve nuk përhapet te njerëzit. Mostrat e shpendëve të ngordhur prej 4 ditësh janë dërguar në institut. Gripi dyshohet se është përhapur nga harabelat”, – ka thënë Strati.
