Blertina Koka
Sezoni i testimeve për licencat e reja në profesionet e mjekësisë fillon më 2 maj. Agjencia Kombëtare e Provimeve ka publikuar kalendarin kur do të zhvillohen provimet për profesionet e rregulluara të mjekut, farmacistit, stomatologut, infermierit, mamisë, fizioterapistit, logopedistit, teknikut të imazherisë dhe teknikut të laboratorit.
Provimet e shtetit për këto profesione të rregulluara do të zhvillohen brenda periudhës kohore nga java e parë deri në javën e fundit të muajit maj 2017.
Vetëm kandidatët që kanë arritur të përfundojnë programin përkatës të akredituar të studimit dhe/ose kualifikime profesionale në atë profesion kanë të drejtë të japin provimin e shtetit në muajin maj 2017, për të fituar licencën profesionale në një nga specialitetet e përcaktuara mjekësore.
Provimi i shtetit do të zhvillohet në godinën e Agjencisë Kombëtare të Provimeve (më poshtë AKP) me adresë: Rruga: “Naim Frashëri”, Nr. 37, Tiranë.
Të parët që do të hapin sezonin e majit për këto profesione janë mjekët, të cilët do të futen në provim më 2 maj, në orën 09:00 dhe 11:30. Brenda ditës do të zhvillohet provimi edhe për një pjesë të farmacistëve, në orën 14:00 dhe 15:30. Pas tyre renditen stomatologët, teknikët e imazherisë, teknikët e laboratorit, mamitë, fizioterapistët, logopedistët dhe në fund infermierët.
Për shkak të numrit të lartë të kandidatëve, gjysma e dytë e muajit maj është përcaktuar vetëm për profesionin e infermierit, përkatësisht nga data 16-31 maj. / Shendeti.com.al
