Deputeti i Partisë Demokratike, Bardh Spahia, ka bërë një denoncim sot për një situatë që ai e quan shumë të rëndë që po ndodh tek materniteti “Koço Gliozheni”. Deputeti Spahia bën të ditur se në pavionin e Neonatologjisë te Materniteti i Ri mungojnë inkubatorët dhe poste për oksigjenimin e foshnjave të sapolindura. Si pasojë, siç thotë deputeti, kanë humbur jetën vetëm në janar 10 të sapolindur, 3 prej tyre vetëm në 24 orët e fundit.
Reagimi i plotë:
“Situatë e rëndë në pavionin e Neonatologjise te Materniteti i Ri. Nuk ka inkubatorë dhe poste për oksigjenimin e fëmijëve. Janë gjithsej 13 burime oksigjeni për 19 fëmijë neonate që kanë nevojë e si pasojë e mungesave bëhen lidhje dyshe; 1 inkubator për 2 neonate. Për 30 orë, si pasojë e këtyre kushteve, ka pasur 5 vdekje neonatesh, nga këto 3 vdekje ne 24 orëshin e fundit. Për muajin janar janë 10 raste të tilla fatale, domethënë 1 rast në ditë. Kur situata paraqitet e tillë në Tiranë, as nuk mund ta imagjinoj çfarë ndodh në rrethe. Për këtë situatë që vazhdon prej 4-5 muajsh janë vënë në dijeni strukturat drejtuese të Ministrisë së Shëndetësisë. Papërgjegjshmëria e atyre që drejtojnë shëndetësinë vazhdon, me pasoja të rënda për jetën e foshnjave dhe nënave. Ndërkohë Edvin Rama tallet me shqiptarët duke i uruar mirëmëngjesi nga mega vila e tij në Surrel./ Shendeti.com.al
