Kam prej 25 vitesh që vuaj nga diabeti dhe më janë ënjtur këmbët. Përdor fosomax, por nuk bën asnjë efekt. A mund të më jepni ndonjë këshillë?
Përgjigjet Dashamir Gjergji, mjek endokrinolog në Poliklinikën e Specialiteteve nr.3, Tiranë.
Ënjtja e këmbëve në rastin konkret nuk është se ka lidhje të drejtpërdrejtë me diabetin, por ka lidhje më tepër me sistemin e qarkullimit të gjakut, që do të thotë ndoshta vetë diabeti mund të ketë qenë shkak që ka sjellë një lodhje të sistemit cirkulator (qarkullues gjaku), kryesisht zemrës, dhe në momentin që zemra bën atë që ne i themi insuficiencë (pamjaftueshmëri) të punës së saj, atëherë nuk qarkullon siç duhet lëngjet, nuk kthehen nga periferia në qendër dhe ndodh edema, ose fryerja apo shtimi i ujit në pjesën e këmbëve. Bari që pacienti shkruan sigurisht është një bar për uljen e edemës, pra shkarkues diuretik që i themi ndryshe, por duhet të konsultohet mirë me mjekun e zemrës për të marrë një përgjigje përfundimtare rreth këtij problemi. Në lidhje me diabetin, duhet të kishim disa të dhëna të ecurisë dhe rreth mjekimit, për të bërë një gjykim më të saktë./ Shendeti.com.al
