Përshtati në shqip: Arlinda Rexhmati
Çokollata e zezë është plot lëndë ushqyese që mund të ndikojnë pozitivisht në shëndet. E nxjerrë nga farat e pemës së kakaos, ajo është një nga burimet më të mira të antioksidantëve në planet.
Studime të ndryshme kanë treguar se çokollata e zezë mund të përmirësojë shëndetin dhe të ulë rrezikun për sëmundje të zemrës.
6 përfitime shëndetësore nga çokollata e zezë, të mbështëtura dhe nga shkenca, janë:
- Shumë ushqyese
Çokollata e zezë, që ka përmbajtje të lartë kakaoje, është shumë ushqyese. Ajo përmban një sasi të konsiderueshme fibre të tretshme dhe është e mbushur me minerale.
100 gram çokollatë e zezë me 70 – 85% kakao ka në përbërje:
11 gram fibër
58% magnez të masës ditore të rekomanduar
67% hekur të masës ditore të rekomanduar
89% bakër të masës ditore të rekomanduar
98% mangan të masës ditore të rekomanduar
Gjithashtu përmban kalium, fosfor, zink dhe selen. Sigurisht, 100 gram është një sasi e konsiderueshme, dhe nuk duhet konsumuar çdo ditë. Meqe të gjitha këto lëndë ushqyese në 100 gram çokollatë të zezë shoqërohen me 600 kalori, konsumimi i saj duhet të jetë i moderuar.
- Burim i fuqishëm antioksidantësh
Çokollata e zezë është e mbushur me përbërje organike që janë biologjikisht aktive dhe funksionojnë si antioksidantë. Këtu përfshihen polifenolët, flavanolët, katekinët etj.
- Mund të përmirësojë qarkullimin e gjakut dhe të ulë tensionin e tij
Flavanolët në çokollatën e zezë mund të stimulojnë endoteliumin,veshjen e arterieve, për të prodhuar oksidin nitrik. Një nga fuknksionet e ON është dërgimi i sinjaleve në arterie për t’u relaksuar, gjë që ul rezistencën e qarkullimit të gjakut e kështu redukton tensionin e gjakut.
- Mund të reduktojë riskun e sëmundjeve të zemrës
Konsumimi i çokollatës së zezë mund të përmirësojë disa faktorë risku të rëndësishëm të sëmundjeve të zemrës. Përbërësit e çokollatës së zezë veprojnë kundër oksidimit të LDL. Oksidimi i LDL (kolesteroli i keq) ndodh kur ky i fundit ka vepruar me radikalet e lira. Kjo e bën LDL të aftë për të dëmtuar indet, siç është veshja e arterieve të zemrës.
Çokollata e zezë, gjithashtu, mund të reduktojë rezistencën ndaj insulinës, që është një tjetër faktor risku për shumë sëmundje të zemrës dhe diabetin.
- Mund ta mbrojë lëkurën nga dielli
Përbërësit bioaktivë në çokollatën e zezë mund të jenë shumë të mirë për lëkurën tuaj. Flavonolët mund ta mbrojnë atë ndaj dëmtimit nga dielli, të përmirësojnë qarkullimin e gjakut në lëkurë dhe të rrisin densitetin dhe hidratimin e lëkurës.
- Mund të përmirësojë funksionin e trurit
Një studim me vullnetarë të shëndetshëm tregoi se ngrënia e çokollatës së pasur me kakao dhe flavanolë për 5 ditë përmirëson qarkullimin e gjakut në tru.
Gjithashtu, kakaoja mund të përmirësojë në mënyrë domethënëse, funksionin konjitiv tek të moshuarit me dëmtime mendore.
Për më tepër, kakaoja në çokollatën e zezë përmban substanca stimuluese si kafeina dhe teobromina, që mund të jenë një arsye kyç për përmirësimin e funksionit të trurit në term afatshkurtër.
Burimi: Healthline
