Përshtati në shqip: Arlinda Rexhmati
Numri i vdekjeve nga koronavirusi i Wuhan, në Kinë, e ka kaluar atë të vdekjeve nga epidemia e Sindromës Respiratore Akute të Rëndë(SARS) të vitit 2003.
Më shumë se 360 persona kanë vdekur nga sëmundja në Kinë, sipas autoriteteve shëndetësore në vend. Të dielën në darkë numri i rasteve të infektuara ishte 17,205, një rritje me 2,800 persona më shumë se një ditë më parë, që do të thotë pothuajse 20% rritje.
Epidemia e SARS e vitit 2003, një tjetër lloj koronavirusi, infektoi 5,327 persona në Kinë, dhe pati 349 vdekje.
Vdekja e parë nga koronavirusi jashtë Kinës u konfirmua në fundjavë. Autoritetet shëndetësore në Filipine u shprehën se një 44 vjeçar kinez vdiq të shtunën, pasi kishte fluturuar me avion nga Wuhan.
Deri tani, më shumë se 175 raste të prekurish nga koronavirusi janë raportuar jashtë Kinës (shumica e të cilave me lidhje direkte me këtë vend), në më shumë se 25 shtete në të gjithë botën. Shumë vende kanë filluar të mbyllin kufijtë e tyre për vizitorët nga Kina, dhe linja të mëdha ajrore kanë anulluar fluturimet nga dhe për në vend.
Gjermania konfirmoi rastin e saj të 10 të dielën, dhe raste të reja u raportuan në Korenë e Jugut, Vietnam, Malajzi, Makao dhe Hong Kong. Shtetet e Bashkuara, Australia dhe Zelanda e Re deklaruan se nuk do të lejojnë hyrjen në vend të të huajve që kanë udhëtuar apo kanë kaluar në Kinë. Personat nga vende të tilla do të detyrohen të futen në kuarantinë menjëherë sapo të mbërrijnë.
Burimi: CNN
