Ministri i Shëndetësisë, Ilir Beqaj dhe ministrja e Arsimit dhe Sporteve, Lindita Nikolla zhvilluan sot një takim për çështjen e gjuhës së huaj, të mbrojtur nga ana e kandidatëve për specializantë.
Ministri i Shëndetësisë, Ilir Beqaj
Në takim u vendos që të pranohet për aplikim dokumenti i njohjes së gjuhës së huaj, në nivel B2, ose ekuivalenti përkatës për gjuhët e tjera, të parashikuara në rregulloren e specializimeve afatgjata në fushën e mjekësisë, me test ndërkombëtar ose me certifikatë të lëshuar nga Fakulteti i Gjuhëve të Huaja.
Takimi i sotëm erdhi pas protestës së kandidatëve për specializantë në mjekësi, të cilët ishin kundër kriterit që i penalizonte ata në garë.
“Kandidatët do të aplikojnë brenda afateve të parashikuara në Udhëzimin përkatës Nr.57, datë 04.12.2014. Specializantët kanë detyrimin e mbrojtjes së gjuhës së huaj deri në përfundimin e specializimit afatgjatë sipas Ligjit Nr. 9741, datë 21.05.2007 “Për Arsimin e Lartë në Republikën e Shqipërisë”, i ndryshuar dhe akteve nënligjore në fuqi”, thuhet ndër të tjera në vendimin që i është përcjellë Universitetit të Mjekësisë, Tiranë, me shkresë zyrtare.
