Zgjebja, një sëmundje që dikur konsiderohej pothuajse e zhdukur në shumicën e vendeve të zhvilluara, po përjeton një rikthim shqetësues në Itali. Sipas Shoqatës Italiane të Dermatologjisë dhe Sëmundjeve Seksualisht të Transmetueshme (SIDeMaST), rastet e raportuara të zgjebjes janë rritur me 750% gjatë periudhës 2020–2023. Kjo rritje e ndjeshme ka ndezur alarmin në institucionet shëndetësore dhe sociale, veçanërisht në shtëpitë e përkujdesjes për të moshuarit, shkolla dhe spitale, ku përhapja është më e lehtë për shkak të kontakteve të ngushta ndërpersonale.
Një studim i botuar në revistën shkencore “Sëmundjet Infektive të Varfërisë” e përshkruan situatën si një kërcënim në zhvillim për shëndetin publik. Po ashtu, një tjetër kërkim i publikuar në revistën “Infeksionet Seksualisht të Transmetueshme” konfirmon rritjen eksponenciale të rasteve në qytete si Bolonja.
Zgjebja shkaktohet nga një merimangë mikroskopike, Sarcoptes scabiei, që depërton në lëkurën e njeriut dhe shkakton kruarje intensive, sidomos gjatë natës. Sëmundja përhapet nëpërmjet kontaktit të drejtpërdrejtë me një person të infektuar, ose përmes objekteve të ndotura si çarçafët, rrobat apo peshqirët.
Simptomat përfshijnë skuqje dhe papula të vogla, zakonisht të lokalizuara në hapësirat ndërmjet gishtërinjve, në kyçe, rreth kërthizës ose në zonën gjenitale. Në rast dyshimi, mjekët këshillojnë konsultë të menjëhershme për diagnozë të saktë dhe fillim trajtimi, i cili zakonisht bazohet në përdorimin e permetrinës.
Personat më të rrezikuar janë fëmijët dhe adoleshentët, për shkak të kontakteve të shumta në ambiente të mbyllura si shkollat dhe palestrat. Po ashtu, të moshuarit që jetojnë në qendra përkujdesjeje, personat e shtruar në spitale, emigrantët dhe të pastrehët janë gjithashtu grupe të cenueshme, veçanërisht kur jetojnë në kushte të mbipopulluara apo me higjienë të pamjaftueshme./a2cnn
