Institucioni i Avokatit të Popullit ka dorëzuar një projekt raport në Ministrinë e Shëndetësisë lidhur me problemet dhe gjendjen e spitaleve në vend. Në të vihet në dukje se Spitalit Universitar të Traumës (ish-Spitali Ushtarak) i mungon heliodromi për uljen e helikopterëve të Ministrisë së Mbrojtjes, ndërsa helikopterët sanitarë kanë mungesë të aparaturave të mjeteve të komunikimit. Raporti është nxjerrë pas monitorimeve të bëra.
Në të thuhet se gjatë monitorimit është vënë re “mungesa e aparaturave të mjeteve të komunikimit në helikopterët sanitarë, ndërkohë që ka rezultuar të mungojnë tërësisht barelat për transportin e të aksidentuarve në shtyllën kurrizore. Gjithashtu, problem jo i vogël konsiderohet të jetë mungesa e një heliodromi të përshtatshëm në Spitalin Ushtarak, pasi në atë aktualin mund të realizohet ulja e helikopterëve në shërbim të Ministrisë së Shëndetësisë dhe jo e helikopterëve në shërbim të Ministrisë së Mbrojtjes, fakt dhe që detyroi transportimin e shtetasve të dëmtuar fillimisht në Aeroportin e Rinasit, e më tej me ambulancë pranë Spitalit Ushtarak”.
Lidhur me aparaturat thuhet se ato janë relativisht të vjetra, ndërkohë që problem tashmë i ngritur shumë është mungesa e pajisjes së rezonancës magnetike. Një gjë e tillë po i bën njerëzit të shfrytëzojnë spitalin privat që ndodhet në ambjentet e ish-Spitalit Ushtarak e përkatësisht Spitalin Amerikan.
Gjithashtu nga Avokati i Popullit është treguar se Spitali Psikiatrik dhe ai Civil kanë nevojë për ndërrimin e xhamave, pajisjeve hotelerike (çarçaf, peshqirë), pajisjen e të gjitha reparteve me tavolina dhe karrige, lyerjen e mureve, si dhe riparimin e të gjitha problematikave në infrastrukturë. Në raport rekomandohet marrja e masave për vendosjen e dyerve të munguara në tualetet e çdo reparti, pajisjen me produkte higjieno-sanitarë, si dhe mundësimin e rrjetit të ujit të pijshëm 24 orësh pa ndërprerje.
Tek Spitali Infektiv, siç edhe gazeta “Shëndet+” e ka ngritur si shqetësim, lagështia në mure përbën një problem jo të vogël.
Shqetësimi i madh i ngritur nga Avokati i Popullit është edhe emërimi i mjekëve dhe administratës. Në raport thuhet se drejtimi dhe organizimi shëndetësor, menaxhimi i sistemit nga një administratë joprofesionale është problem thelbësor për prapambetjen, mosrealizimin e reformave dhe mangësitë që hasen në sistem. Gjithashtu, vlerësohet se emërimet nepotike në krye të institucioneve bazuar vetëm mbi bindjet politike, si dhe lëvizjet e shpeshta apo ndryshimet e stafeve drejtuese nga ana tjetër, sjellin menaxhimin dhe alokimin e keq të fondeve, keqpërdorimin dhe abuzimin me to, mungesën persistente të medikamenteve dhe materialeve të tjera mjekuese në spitale, apo pamundësi për kryerjen e analizave për të sëmurët në institucionet publike për mungesa të kiteve dhe reagjentëve.
