Lista e barnave të rimbursueshme do të përfshijë më shumë barna për kategori të caktuara të pacientëve. Buxheti që do të ketë Instituti i Sigurimeve të Kujdesit Shëndetësor të jetë më i madh, duke siguruar një mbulim më të mirë me shërbime shëndetësore e barna. Ky premtim vjen nga drejtori i këtij institucioni Astrit Beci cili thotë se pavarësisht borxheve të mëdha të trashëguara dhe gjendjes së vështirë, do të synohet për më shumë lloje medikamentesh dhe me çmime më të ulëta.
“Ne presim rritje të buxhetit por puna jonë do drejtohet edhe në drejtim të kursimit dhe mirmenaxhimit të fondeve ekzistuese. Jemi ballafaquar me një situatë të rënduar në sektor. Do kemi një shtim të listës. Do kërkojmë alternativa të tjera gjenerike që të kemi synimin e një çmimi dhe një rritje të gamës të përfituesve nga këto ilaçe. Do kemi prioritet edhe ngushtimit të diferencës së alternativës së parë me alternativës së dytë gjenerike. Ngushtim ky që do pasqyrohet direkt te pacientët”- tha Astrit Beci.
Kreu i ISKSH, ka paralajmëruar edhe ndryshim të mënyrës se si finacohen spitalet.
“Po ripunojmë aktet ligjore dhe po ripunojmë me ligjin pasi dhe sistemi do ndryshojë, nga kontributiv në sistem universal, kështu që ndryshimet në ligj do jenë të parat që do vijnë. Do bëhen ndryshime në financimet e spitalit dhe kontrollit të këtij sistemi në institucionit tonë”- tha Beci.
Pak ditë më parë vetë kreu i shëndetsisë Ilir Beqja deklaroi se sektori spitalor ka një borxh të madh të trashëguar që shkon deri në 44 milionë dollarë, ku një pjesë të madhe të këtij borxhi e ka QSUT nga barnat dhe pajisjet që janë blerë, por bizneset ende nuk janë paguar
