Nëse po përpiqeni të ushqeheni më shëndetshëm dhe të përfshini më shumë perime në dietën tuaj, brokoli dhe lulelakra janë ndër zgjedhjet më të zakonshme. Të dyja i përkasin familjes së perimeve kryqëzore dhe njihen për përfitimet e tyre në shëndetin e mëlçisë, sistemin imunitar dhe uljen e rrezikut për disa lloje kanceri. Por cila është më e mirë?
Vlerat ushqyese: shumë të ngjashme
Sipas të dhënave ushqimore, 100 gramë brokoli përmbajnë rreth 39 kalori, 3 gramë proteina, 6 gramë karbohidrate dhe 2 gramë fibra. Ndërsa lulelakra për të njëjtën sasi ka 28 kalori, 2 gramë proteina, 5 gramë karbohidrate dhe po ashtu 2 gramë fibra.
Pra, për sa i përket fibrave, të dyja perimet janë pothuajse identike.
Përfitimet e brokolit
Brokoli konsiderohet një “bombë ushqyese”, pasi është i pasur me vitamina C dhe K, fibra dhe antioksidantë. Një porcion mund të plotësojë mbi 100% të nevojës ditore për këto vitamina, duke ndihmuar sistemin imunitar dhe shëndetin e kockave.
Ai përmban gjithashtu sulforafan, një përbërës që mund të ndihmojë në reduktimin e inflamacionit, përmirësimin e funksionit të trurit dhe mbrojtjen ndaj disa sëmundjeve.
Megjithatë, tek disa persona mund të shkaktojë fryrje apo gazra, sidomos nëse nuk janë mësuar me ushqime të pasura me fibra.
Përfitimet e lulelakrës
Edhe lulelakra është e pasur me fibra dhe antioksidantë, ndërsa përmban pak më pak vitaminë C se brokoli. Ajo është një burim i mirë i folatit (vitamina B9), e rëndësishme për formimin e qelizave të kuqe të gjakut dhe zhvillimin e shëndetshëm gjatë shtatzënisë.
Për më tepër, përmban përbërës që mund të ndihmojnë në mbrojtjen ndaj kancerit dhe në forcimin e sistemit imunitar.
Si brokoli, edhe lulelakra mund të shkaktojë fryrje tek disa persona dhe, në sasi shumë të mëdha, mund të ndikojë në funksionin e tiroides.
Cila është më e mirë për dobësim?
Të dyja janë zgjedhje shumë të mira për humbje peshe. Janë të ulëta në kalori, të pasura me fibra dhe ndihmojnë në ndjesinë e ngopjes.
Përfundimi
Nuk ka një fitues të qartë. Brokoli ka më shumë vitamina dhe antioksidantë, ndërsa lulelakra ka më pak karbohidrate dhe më shumë vitamina të grupit B. Të dyja janë shumë të shëndetshme dhe ekspertët rekomandojnë t’i përfshini të dyja në dietën tuaj për përfitime maksimale.
