Përgjigjja nga dr. prof. Jera Kruja, shefe e Shërbimit Universitar të Neurologjisë, QSUT “Nënë Tereza”, si dhe Presidente e Shoqatës Shqiptare të Dhimbjeve të Kokës
Në përgjithësi gratë e vajzat vuajnë më shumë nga dhimbjet e kokës duke pasur parasysh rastet me migrenë (raporti 3 femra : 1 mashkull), dhimbjet tensive episodike, dhimbjet nga abuzimi me qetësues. Ka disa 
hipoteza që shpjegojnë këto ndryshime, si: fluktuacionet e hormoneve seksuale, faktorët gjenetikë, ndryshimet në ekspozimin ndaj ngacmimeve mjedisore, si edhe ndryshimet në përgjigjen ndaj perceptimit të stresit dhe dhimbjes.
Dhimbjet e kokës mund të takohen në çdo moshë, përfshirë edhe fëmijët. Në moshë të vogël ka vëshirësi diagnostikimi se dhimbja e kokës mund të mos ekzistojë, por edhe forma të veçanta të dhimbjes së barkut ose të ashtuquajturat “të vjella ciklike”, mund të jenë shenja të një migrene që merr formën klasike vetëm me rritjen e moshës së fëmijës. Megjithatë, nuk mund të jepen shifra të sakta prevalence, sepse sipas Atlasit të Çrregullimeve të Dhimbjeve të kokës (2011), mungojnë ende studimet e plota e të besueshme epidemiologjike në këtë drejtim.
