Nga mjekja gjinekologe Kozeta Mustafaraj:
Për gratë që kanë cikël menstrual të rregullt, shenja më e hershme dhe më e besueshme është mosardhja e ciklit në datën e pritur. Ndonjëherë gratë në këtë periudhe kohore mund të kenë humbje gjaku të lehtë. Përgjithësisht shenjat janë të ndryshme në gra të ndryshme:
- Lodhje dhe të përziera apo të vjella në mëngjes më shpesh. Kjo gjendje nis nga java e 6-të e shtatzënisë deri rreth javës së 12-të. Ndryshimet hormonale bëjnë që gruaja të ndihet e lodhur, nervoze dhe emocionalisht e paqëndrueshme.
- Ndryshime të gjoksit: zmadhohet dhe bëhet më i ndjeshëm, i dhembshëm, venat bëhen më të dukshme nën lëkurë, areola bëhet më e errët dhe qëndron e tillë deri pas lindjes.
- Urinim i shpeshtë, shpesh edhe gjatë natës
- Ndryshime të daljes jashtë (konstipacion)
- Shije metalike në gojë, dëshirë për ushqime të ndryshme, mospërdorimi i ushqimeve të mëparshme, si: çaj, kafe, duhan etj.
- Shtimi i nuhatjes dhe mospëlqimi i aromave të ndryshme
- Rritje të sekrecioneve vaginale, të pashoqëruara me irritim apo dhembje
