Doktoreshë, doja të dija nëse çrregullimi i ciklit tek femrat që kanë pasur cikël të rregullt, është lajmërues për infeksion?
Përgjigjja nga mjekja Silvana Çeliku
Çrregullimet e ciklit kanë faktorë të ndryshëm. Megjithatë cikli ndryshon. Ndryshe është cikli para shtatzënisë, ndryshe pas 
shtatzënisë. Ciklet kanë tendencën të ndryshojnë. Ndryshon edhe me moshën. Ndryshe është cikli në 10-vjeçarin e parë, ndryshe në të dytin, ndryshe pas 35 vjetësh. Kemi gjithmonë një evolucion dhe një ndryshim të ciklit menstrual, cikli nuk mbetet kurrë i njëjtë etj. Askush nuk mund të ketë një cikël perfekt.
Sigurisht që në disa raste është paralajmërues. Çrregullimet mund të jenë paralajmërues të kancerit të mitrës, paralajmërues të kancereve të formave të tjera, si kanceri i vaginës për shembull etj. Në çrregullim mund të ndikojnë gjithashtu infeksione të ndryshme, një barrë jashtë mitre, një abort për të cilin femra mund të mos jetë në dijeni, por që mund të ketë filluar. Kur kemi çrregullim të ciklit me shtim të fluksit dhe me zgjatje në kohë, gjërat që duhet të përjashtohen janë shtatzënia, aborti, një barrë jashtë mitre, një përdredhje e vezores etj.
