Sëmundjet tumorale po njohin rritje të ndjeshme në Shqipëri ndërsa të dhënat zyrtare nga Instituti i Shëndetit Publik tregojnë se çdo vit regjistrohen rreth 6700 raste të reja me kancer, ndërsa rreth 800 prej tyre janë raste me kancer të mushkërive.
Sipas mjekëve të Spitalit “Shefqet Ndroqi”, shqetësuese është fakti që kjo sëmundje po prek gjithnjë e më shumë moshat e reja.
“Dikur kanceri i mushkërive ishte i përqendruar tek moshat mbi 60 vjeç, ndërsa tani po haset edhe tek 30-vjeçarët. Sëmundja kapet zakonisht në stad të avancuar, të tretë apo të katërt,” – deklaron Arben Tanka, pneumolog në Spitalin “Shefqet Ndroqi”.
Mjekët theksojnë se duhanpirja mbetet faktori kryesor i kësaj patologjie.
“Rreth 85% e rasteve me kancer mushkërie kanë si shkaktar duhanin,” – shton mjeku Tanka.
Sipas Organizatës Botërore të Shëndetësisë numri i rasteve me sëmundje tumorale në Shqipëri pritet të rritet edhe më tej në vitet në vijim./euronews
