Përshtati për gazetën “Shëndet+”: Blertina Koka
Një grusht me arra në ditë mund t’ju ndihmojë të qëndroni larg sëmundjeve të zemrës dhe atyre që vijnë me kalimin e moshës. Një studim i fundit ka treguar se konsumimi i rregullt i arrave ul nivelin e kolesterolit.
Arrat gjithashtu ulin rrezikun për të vuajtur nga sindroma metabolike, ku përfshihen sëmundje si tensioni i lartë i gjakut apo obeziteti, të cilat të dyja së bashku rrisin rrezikun për goditje në tru dhe sulm në zemër. Përveç kësaj, të gjitha këto sëmundje së bashku shkaktojnë shtim në peshë. Të gjitha frutat e thata janë të mira për shëndetin, megjithatë arrat përmbajnë më shumë acide yndyrore omega-3, vlera ushqyese këto shumë të rëndësishme për shëndetin.
Mjekët nga Klinika Spitalore në Barcelonë dhe Universiteti Loma Linda në Barcelonë matën nivelet e kolesterolit në më shumë se 700 meshkuj dhe femra të moshuar. Gjysma e tyre shtuan rreth 50 gramë arra (gati një grusht) në dietën ushqimore, ndërsa gjysma tjetër hëngrën si zakonisht. Pas një viti, niveli i kolesterolit LDL (një nga format më të këqija për bllokimin e arterieve) ra tek personat që konsumuan arra.
Një studim tjetër ka treguar se arrat ndihmojnë edhe në ngadalësimin e rritjes së tumoreve të kancerit. Acidet yndyrore omega-3 tek arrat mund të reduktojnë inflamacionin në qelizat kanceroze të zorrëve. Përveç kësaj, ato zvogëlojnë furnizimin me gjak, duke ngadalësuar rritjen e tumorit.
Përfitimet shëndetësore të arrave nuk përfundojnë këtu. Arrat mbajnë edhe trurin të mprehtë dhe na mbrojnë nga degjenerimi makular që lidhet me moshën, një nga shkaktarët më të zakonshëm të verbërisë tek të moshuarit.
Burimi: Daily Mail / https://shendeti.com.al/
