Nga Blerina Bombaj, dietologe
Konsumi i yndyrave omega-3, mund të ulë rrezikun e diabetit te fëmijët
Diabeti i tipit 1 është një sëmundje autoimunitare, e cila në më të shumtën e rasteve shfaqet në moshën fëminore. Së fundmi shkenca ka arritur të dyshojë mbi disa faktorë risku, edhe pse akoma nuk është i qartë shkaku i sëmundjes. Fëmijët që preken nga diabeti i tipit 1 janë të varur nga injektimi i insulinës përgjatë gjithë jetës në vazhdim.
Në vitin 2007, J.M. Norris dhe kolegët e tij raportuan se fëmijët me predispozite të rritur për shfaqje të diabetit të tipit 1, mund të ulnin rrezikun e sëmundjes thjesht duke konsumuar më shumë omega 3. Studiuesit vlerësuan 1770 fëmijë, të cilët kishin predispozitë të lartë për të shfaqur diabet të tipit 1, dhe kërkuan nga prindërit e tyre të plotësonin survejime vjetore, të cilat regjistronin shpeshtësinë e konsumit të yndyrave omega 3 nga fëmijët e moshave 3, 6 dhe 9 vjeç. Pjesëmarrësve iu mor gjithashtu mostër gjaku, e cila u ekzaminua për antikorpe, qelizat imunitare që mund të sulmojnë gabimisht vetë qelizat e trupit (në rastin e diabetit të tipit 1, antikorpet sulmojnë dhe shkatërrojnë qelizat beta të pankreasit, të cilat prodhojnë insulinën, duke çuar individin në diabet insulinovartës).
Në fund të kërkimit 6-vjeçar, të dhënat treguan se për çdo 800mg rritje të konsumit të yndyrave omega 3 në ditë, probabiliteti i shfaqjes së antikorpeve të “rrezikshme” ulej me 55%. Interesant u konsiderua fakti se, yndyrat omega 3 në dietën e fëmijëve që u morën nën vëzhgim në këtë studim, vinin nga ushqime bimore, si arrat dhe farat e linit.
Sa omega 3 rekomandohet të marrin fëmijët në ditë?
Rekomandimet për sasinë ditore të nevojshme për të marrë një fëmijë në ditë janë:
- 0-12 muaj: 500mg/ditë
- 1-3 vjeç: 700mg/ditë
- 4-8vjeç: 900mg/ditë
- 9-13: 1000mg-1200mg/ditë
Ushqime që përmbajnë omega 3:
- 100gr sardele, ton, salmon, skumber, acuge – 500mg
- 100gr ton, ostrike, karkaleca, shojza, barbun, peshk shpate, ngjala, midhje, gaforre, sepje – 150-500mg
- 100gr merluc, arragoste – më pak se 150mg
- ¼ kupë arra – 2700mg
- ¼ kupë fara lini 6300mg/ Shendeti.com.al
