Shkrimtari i madh i letrave shqipe, Dritëro Agolli prej kohësh nuk është në gjendje të mirë shëndetësore. Është e bija e tij Elona e cila konfirmon përmes një statusi në Facebook, se poeti ndodhet në “luftë me errësirën”.
Në dedikimin prekës kushtuar të atit fshihet dhimbja dhe malli që ndjen për të. Midis fjalëve prekëse ajo shkruan: “Nëse do të mund të dhurohej jeta, unë do ta jepja për ty”.
“Babushi im më ndje; e di që ti në këtë orë lufton me errësirën, pasi ti e urren atë. Ti pret dritën. Unë jam me pjellën time tani, në një botë krejt ndryshe nga e jona, në një botë ku konsumohet e gëzohet; e ndërsa ti, i përhumbur mendon sesi do të jetë ajo botë e përtejme, ku mbizotëron errësira, ajo çka vështirë për ty si ateist, të mendohet e bukur dhe shpresëdhënëse. Ati im më ndje; unë jam me Luelin e duhet të jem e gëzuar në sytë e tij, paçka se zemra pikon lot, paçka se mendjen e kam tek ti. Të dua shumë ati im. Nëse do të mund të dhurohej jeta, unë do ta jepja për ty; nëse do të mund të transferohej gëzimi, unë do të bëja ç’mos të të lumturoja. Sot të bleva një shishe bojë e një pompë për stilografin tënd. Siç ma dhe porosinë para se të nisesha. Kur të kthehem, do të t’i tregoj dhe e di që do kënaqesh. Do mbushësh penën tënde, që aq ka gërvishtur letrën e aq vargje e radhë ka shkruar. Të dua shumë Ati im”, shkruan Elona.
