Ministri i Shëndetësisë, Ilir Beqaj, ka humbur gjyqin ndaj kreut të opozitës, Lulzim Basha. Gjykata e Tiranës ka rrëzuar sot pretendimet e ministrit të Shëndetësisë, i cili u ankua për shpifjet dhe denoncimet që ka bërë ndaj tij kryetari i PD, Lulzim Basha.
Ministri i Shëndetësisë pretendonte se kreu i opozitës ka shpifur ndaj tij në një deklaratë të bërë më 17 nëntor të vitit të kaluar (lexo këtu).
Basha ka akuzuar Ministrin e Shëndetësisë se ka favorizuar në tendera kompani, me të cilat ka konflikt interesi. Nëpërmjet një deklarate për mediat, Partia Demokratike shprehet se “Kryetari i PD-së, Basha dhe Partia Demokratike kanë denoncuar ashpër koncesionet e check-up dhe të sterilizimit, afera të pastra financiare, ku Beqaj ka firmosur ndarjen e 350 milionë eurove me klientët e tij”.
“Gjykata e Tiranës sot, edhe pse nën shantazhet e vazhdueshme të hajdutit Ilir Beqaj, ka çmuar se akuzat për korrupsion në shëndetësi, nuk janë shpifje. Tashmë është e çertifikuar edhe zyrtarisht se Ilir Beqaj është kampioni në fushën e vjedhjes dhe përgjegjës për krimin e madh që bëhet ndaj shqiptarëve me kthimin e shëndetësisë në biznesin të tij, në kurriz të qytetarëve”, thuhet në deklaratën e PD-së./ https://shendeti.com.al/
