Jam një djalë 26 vjeç dhe kam probleme me organin gjenital. Kam dhimbje në pjesën para poshtë kokës, brenda kanalit, si djegie, si dhe dhimbje mesi dhe në fund të barkut plus herë pas here dhe rrëzë kofshëve. Kam si tharje të lëkurës gjenitale dhe varje. Kam një rënie shumë të theksuar të dëshirës dhe potencës seksuale.
Kam mbi dy vite me këtë problem. Kam bërë vizita tek andrologu dhe urologu, por analizat më dalin të pastra. Ju lutem më ndihmoni me këshillën ose orientimin tuaj. Mos vallë kam ndonjë lloj prostatit (mendoj unë). Ju faleminderit, pres një përgjigje.
Përgjigjet mjeku androlog Evi Dani
Ankesat tuaja janë të shumta dhe në largësi mund të rri në mendimin që mund të jetë problem i mukozës së penisit. Është një patologji e shpeshtë që njihet si “balanitis”. Kjo patologji është e shpeshtë veçanërisht tek meshkujt që nuk janë bërë synet. Kjo, duke u nisur edhe nga ankesat e tjera, ndërthuret edhe me probleme të uretrës, siç mund të jenë uretritet si më të shpeshtat.
Të dhënat tuaja nuk janë fort të qarta, të tilla që e vënë mjekun në vështirësi nëse pacienti nuk është këtu, megjithatë rasti është i vështirë edhe nëse pacienti do të ishte këtu.
Përsa i përket prostatis (infeksion i prostatës) është një moment që mund të dyshojmë, por megjithatë meqë kemi kaq kohë me ankesa, një kontakt është i domosdoshëm për të vënë diagnozën dhe për të dhënë mjekimin.
