Menta është një nga bimët aromatike më të përdorura në kuzhinë, por përfitimet e saj shkojnë përtej shijes dhe aromës karakteristike. Sipas dietologes Nichola Ludlam-Raine, e cituar nga Daily Mail, menta mund të mbështesë tretjen, shëndetin oral dhe madje të ndihmojë në relaksim, ndërsa i jep ushqimit shije pa shtuar kalori.
Ja 7 përfitimet kryesore të saj:
1. Është burim i lëndëve ushqyese të rëndësishme
Menta përmban vitaminë A, vitaminë C, acid folik (B9), vitaminë B6, si edhe minerale si hekuri, mangani dhe kalciumi. Gjithashtu është e pasur me polifenole dhe acid rozmarinik, përbërës me veti antioksiduese që ndihmojnë në mbrojtjen e organizmit.
2. Mund të ndihmojë tretjen
Mentoli, përbërësi aktiv i mentes, ndihmon në relaksimin e muskujve të traktit tretës dhe mund të lehtësojë fryrjen, ngërçet dhe shqetësimet e stomakut. Studimet kanë treguar se vaji i mentes mund të jetë efektiv në lehtësimin e simptomave të sindromës së zorrës së irritueshme (IBS).
3. Ndihmon në freskimin e frymëmarrjes
Menta përdoret gjerësisht në pastat e dhëmbëve dhe shpëlarësit e gojës. Gjethet e freskëta rrisin prodhimin e pështymës dhe vetitë e tyre natyrale antimikrobike mund të ndihmojnë në reduktimin e baktereve që shkaktojnë erën e keqe të gojës.
4. Mund të ndihmojë në uljen e stresit
Aroma e mentolit lidhet me një ndjenjë relaksimi. Disa studime kanë treguar se inhalimi i vajit esencial të mentes mund të ulë ankthin, të përmirësojë humorin, vigjilencën dhe cilësinë e gjumit.
5. I jep shije ushqimit pa shtuar kalori
Menta është një mënyrë e thjeshtë për t’i dhënë më shumë aromë sallatave, kosit, smoothieve, peshkut apo gatimeve me mish, pa përdorur më shumë kripë, sheqer apo kalori shtesë.
6. Jo të gjitha llojet e mentes janë njësoj
Mentja (peppermint) ka përmbajtje më të lartë mentoli dhe përdoret shpesh në produkte farmaceutike dhe të higjienës orale. Ndërsa menta e gjelbër (spearmint) ka një shije më të butë dhe përdoret më shumë në gatime, sallata dhe pije.
7. Nuk është e përshtatshme për të gjithë
Edhe pse gjethet e freskëta të mentes janë të sigurta për shumicën e njerëzve, produktet e koncentruara, si kapsulat me vaj menteje, mund të përkeqësojnë simptomat e refluksit gastroezofageal (GERD) dhe të ndërveprojnë me disa medikamente. Personat me gurë në tëmth ose probleme të fshikëzës së tëmthit duhet të këshillohen me mjekun para përdorimit të suplementeve.
Ekspertët theksojnë se menta mund të jetë një shtesë e dobishme në një dietë të ekuilibruar, por nuk zëvendëson një regjim të shëndetshëm ushqimor apo trajtimin mjekësor kur ai është i nevojshëm.
