Toni dhe ngjyra e mishrave të dhëmbëve janë një tregues i rëndësishëm i shëndetit të gojës, sidomos kur shoqërohen edhe me simptoma të tjera. Ja çfarë mund të nënkuptojnë disa ndryshime ngjyrash:
Rozë
Mishrat e shëndetshme janë zakonisht rozë, pa ënjtje apo ndjeshmëri. Një shenjë tjetër e mirë është mungesa e gjakderdhjes gjatë larjes së dhëmbëve ose përdorimit të fillit dentar, si dhe fryma e freskët.
Të kuqe
Mishrat e skuqura, të irrituara ose të fryra mund të tregojnë gingivit – një inflamacion i shkaktuar nga grumbullimi i pllakës dentare. Nëse nuk trajtohet, mund të përkeqësohet dhe të dëmtojë mishrat apo dhëmbët. Zakonisht përmirësohet me higjienë të mirë orale dhe pastrime te dentisti.
Vjollcë e errët
Mund të jetë shenjë e periodontitit, një formë më e avancuar e sëmundjes së mishrave të dhëmbëve. Mund të shoqërohet me dhimbje, ënjtje dhe në disa raste edhe qelb. Kërkon trajtim dentar dhe ndonjëherë antibiotikë ose ndërhyrje më të specializuar.
Shumë të errëta ose të zeza
Mund të tregojnë periodontit të rëndë, por edhe faktorë të tjerë si duhani, disa ilaçe apo probleme shëndetësore. Kjo gjendje kërkon vlerësim të menjëhershëm nga dentisti, pasi mund të çojë në humbje të dhëmbëve.
Shumë të zbehta ose të bardha
Mund të lidhen me anemi (mungesë hekuri ose vitaminash), ose me përdorim të tepruar të produkteve zbardhuese. Nëse ndryshimi i ngjyrës vazhdon ose shoqërohet me dhimbje, duhet konsultë me dentistin.
Këshillë e përgjithshme:
Lani dhëmbët 2 herë në ditë, përdorni fill dentar çdo ditë dhe bëni kontrolle të rregullta te dentisti për të ruajtur shëndetin oral.
