Drilona Kishta është fizikante mjekësore në QSUT. Ajo rrëfen punën e saj mes aparaturave rrezatuese dhe reagimet e bluzave të bardha
Ajo ngjason me një vjzë të brishtë dhe pak kush mund ta besojë se puna e saj është shuëm e rëndësishem jo vetëm për pacientët por edhe për personelin shëndetësor. Kur nisi këtë punë sapo kishte dalë nga bankat e shkollës dhe askush nuk e merrte seriozisht. Besimi i bluzave të bardha ndaj saj duke filluar nga specializantët e deri tek emrat më të mëdhenj të mjekësisë ishte thuajse zero. Puna e saj? Të monitorojë dhe të evidentojë çdo rrezik që vjen nga rrezatimi i aparaturave në spitalin më të madh të vendit, në QSUT. Quhet Drilona Kishta. Kurse zanati i saj quhet “fizikante mjekësore”.
Prindër këmbëngulës
Drilona, një nga 3 fëmijët e një babai ushtarak dhe një nëne mësuese, është diplomuar me rezultate të shkëlqyera në Fakultetin e Shkencave Ekzakte në degën e Fizikës. Kjo do t’i hapte rrugën për të qenë një fizikante mjekësore. Tashmë është në proces doktorature pikërisht për këtë degë.
“Ka qenë këmbëngulja e prindërve, sidomos e babit, për të studiuar në këtë degë. Unë kam dashur shumë degën e drejtësisë. Por nuk jam penduar aspak për këtë zgjedhje, tashmë e kuptoj babin, mendoj se jam në vendin e duhur. Edhe motra dhe vëllai vazhduan për shkencat ekzakte”.
Mes aparaturave…
Para 6 vitesh, kur sapo kishte mbaruar Fakultetin, ajo nisi punë në spitalin ku aparaturat janë më të shumta se kudo tjetër. Në spitale e njohin si “përgjegjësja e sektorit radio mbrojtës”. “Detyra ime është të kem një inventar të plotë të gjithë burimeve radioaktive që ka qendra spitalore. Të bëj kontrollin dhe të kem gjithë informacionin e dozave të personelit që punojnë në pajiset rrezatuese, t’iu përgjigjem planeve të emergjencave që mund të lindin pikërisht nga rrezatimet”, pohon Drilona.
Kuptohet që nuk është përgjegjësi e vogël. Të gjitha aparaturat, përveç të mirave, kanë edhe risqe, sidomos ato që kanë rrezatime si grafitë, skaneri, radioterapia etj.
Mjekët shqetësohen…
Në fillim e konsideronin thjesht si një vajzë të re që sapo kisha dalë nga bankat e shkollës. “Ishte një sfidë e madhe për mua përballë mjekëve, disa prej tyre janë emra të mëdhenj në këtë fushë”, pohon Drilona.
Por sot është ajo që “gjykon”. Na tregon se bluzat e bardha janë më të frikësuar se të gjithë ndaj rrezatimeve, sepse ata i njohin më mirë se kushdo tjetër pasojat e tyre. “Ata janë të parët, të cilët pyesin me shumë interes se si është situata e aparaturave. Mundohem t’u shpjegoj me çdo detaj rreth aparaturave dhe dozat e rrezatimeve”, pohon fizikantja duke shtuar se nëse rrezatimi është më i madh se normat e lejuara, atëherë bëhet kontrolli i pajisjeve dhe u bëhen analiza të gjithë punonjësve që kanë punuar aty”. Më pas bëhet ristandardizimi i aparaturave.
Central Bërthamor në Shqipëri? Nuk e mbajmë dot nën kontroll
Fizikantja Drilona Kishta ka qenë edhe pjesë edhe e diskutimeve për ndërtimin e një centrali bërthamor në Shqipëri. (ka studiuar më parë rreth dëmit që solli Çernobili). “Roli im në këtë temë ka qenë si eksperte e fizikës bërthamore. Mendoj se vendi ynë për momentin nuk ka infrastrukturën dhe informacionin e mjaftueshëm për të menaxhuar një central bërthamor. Problemi nuk është se sa e vështirë është të ndërtohet një central i tillë, por sa në gjendje jemi që ta mbajmë nën kontroll dhe si mund ta mbrojmë popullatën”, thotë fizikantja Drilona Kishta.
Emri: Drilona Kishta
Profesioni: Fizikante Mjekësore
Mosha: 29 vjeç
Vendlindja: Berat
Vendbanimi: Tiranë
