Nga Elona Tereziu
‘Përmirësimi i sistemit shëndetësor përmes një vote të informuar’, ka qenë tema e diskutimit të sotëm në një tryezë të përbashkët organizuar nga shoqata ‘Together For Life’, e cila vuri përballë hartuesit e programeve shëndetësore në partitë politike dhe përfaqësuesit e rrjetit të shoqatave të pacientëve.
Qëllimi i këtij aktiviteti ishte njohja e qytetarëve shqiptarë me programet shëndetësore të partive politike që garojnë në zgjedhjet e 25 qershorit dhe pasqyrimi i nevojave reale që ka sistemi ynë shëndetësor.
Të pranishëm në këtë aktiviteti ishin përfaqësues nga shoqata e Pacientë me Diabet, Shoqata e Pacienteve me Hepatite, Shoqata e Pacientëve me Hemodialzë, Su Rayder Albania, Europa Dona Albania etj, si dhe hartuesit e programeve shëndetësore në partitë politike të cilët ‘shpalosën’ programet e tyre duke premtuar ndryshime.
Ndër partitë të cilat tashmë e kanë përgatitur programin shëndetësor ishte LIBRA, përfaqësues të së cilës morën pjesë në këtë diskutim. Matilda Beqiri, e cila bëri edhe prezantimin përkatës, u shpreh se: “Ne nuk synojmë ta bëjmë shëndetësinë falas, pasi shëndetësia është një nga gjërat që kushton shumë, por të bëjmë një mbulim universal”.
Ndërkohë që gjatë shpalosjes së programit u ndal në mënyrë të veçantë tek ligji mbi barnat, sistemi i konvencionimit, shërbimin shëndetësor falas për moshat deri në 12 vjeç, kujdesin shëndetësor dhe arsimin e fëmijëve me nevoja të veçanta etj.
Përfaqësuesit e shoqatave theksuan nevojat e tyre, duke renditur një sërë problematikash që hasin çdo ditë në sistemin shëndetësor, që nga keqfunksionimi i sistemit të referimit, mungesa e barnave, rimbursimi i fishave për pacientët me diabet, ligji për transplantin e veshkave etj.
Ky projekt mbështetet nga Programi i Granteve të Vogla i Komisionit për Demokracinë, Ambasada e Shteteve të Bashkuara të Amerikës./ Shendeti.com.al
