Përshtati në shqip për gazetën “Shëndet+”: Blertina Koka
Konsumimi i një gote me lëng boronicash në ditë mund të ndihmojë gratë të mbajnë larg infeksionet e traktit urinar, ka zbuluar një studim i ri nga India. Studimi sugjeron gjithashtu se boronicat e kuqe mund të ndihmojnë në uljen e përdorimit të antibiotikëve në të gjithë botën. Infeksioni i traktit urinar prek një nga pjesët e sistemit urinar, si veshkat, fshikëzën ose pjesën e uretrës.
Studimi më i fundit sugjeron se konsumimi i përditshëm i një gote 240 ml me lëng boronice të kuqe mund të reduktojë infeksionet e traktit urinar me rreth 30% tek gratë që vuajnë nga kjo sëmundje. Ky lëng ndihmon gjithashtu në uljen e përdorimit të antibiotikëve për trajtimin e infeksioneve të traktit urinar.
Infeksionet e traktit urinar janë një nga infeksionet më të përhapura tek femrat. Më shumë se 150 milionë raste me infeksione të traktit urinar raportohen çdo vit në të gjithë botën.
Mbi 60% e grave në të gjithë botën preken nga infeksionet e traktit urinar gjatë jetës së tyre dhe më shumë se 25% e tyre përjetojnë rikthim të kësaj sëmundjeje brenda 6 muajsh.
Antibiotikët përdoren zakonisht për trajtimin e infeksioneve të traktit të urinar. Fatkeqësisht, përdorimi kronik i këtyre ilaçeve ka rritur rezistencën e antibiotikëve në një nivel alarmues.
Boronicat e kuqe përmbajnë lëndë të ndryshme ushqyese që parandalojnë përhapjen e baktereve dhe infeksioneve në trup.
Burimi: Daily Mail / https://shendeti.com.al/
